شموع باث آند بدي

بسم الله الرحمن الرحيم

مرحبا ، تدوينة اليوم عن شموع باث آند بدي ووركس💜

هي شركة أمريكية نشأت عام ١٩٩٠متخصصة في الشور جل واللوشن والعطور والشموع  
 وفي عام ١٩٩٧ أصبحت أكبر شركة في أمريكا متخصصة في أغراض الإستحمام  وهذا موقعهم الرسمي 

💜💜💜

بصراحة أنا مو كثير حبيت أغراض الإستحمام عندهم لكن وقعت في غرام شموعهم بجد متميزة بروائحها القوية واللي تنتشر في أرجاء الغرفة مقارنة بشموع آيكيا وفيكتوريا سيكرتس (بكل أمانه فيكتوريا برضو روائحهم جميلة وتفوح لكن محدوده يعني مافي خيارات متنوعة للروائح أنا جربت العنبر وكانت جميلة جدا ) 

بالنسبة لي أعتبر الشموع شيء أساسي في البيت لتعديل المزاج وإعطاء جو للسكينة والهدوء والإسترخاء وفوق كذا تعطر البيت وتخلي رائحته جميلة وماننسى برضو أنها جزء مهم للديكور والتزيين  

💜💜💜
خلوني أبدأ بالتفاصيل وراح أتكلم عن كل وحده واللي أعجبني و ما أعجبني فيها
هذي المجموعة اللي فوق أشتريتها من باث آند بدي اللي في أبراج البيت والكبيرة منها سعرها٩٥ والصغيرة ٤٥ طبعا أنا أخذتها وكان عليها خصم بس ناسيه كم الخصم لكن عروضهم جميلة جدا لا تفوتوها ،، مرات تكون الكبيرة ب٤٥ والصغيرة ب٢٥

أول وحده راح أتكلم عنها هي أكثر وحده أعجبتني وهي هذي

  

اسمها Sweet Pea  
المعنى الحرفي لها البازيلاء العطرية لكن بحثت عنها طلع إنها زهره عطرية تنتمي لفصيلة البقوليات وموطنها الأصلي في إيطاليا وسبحان الله رائحتها جمييييلة جدا ومميزة كذا حامضة شوي مع زهور يقال إنها تشبه رائحة الياسمين البري مع زهر البنفسج  وهذا شكل النبتة 

بشكل عام هذي أفضل ريحة وتفوح بسرعة لكن في الغرفة اللي تشغلينها فيها فقط أما بالنسبة لدوامها فهي ما تدوم كثير يعني لما تشغلينها تفوح في المكان لكن اذا طفيتيها خلاص تروح الريحة يعني مو قوية تثبت في المكان وهذا ينطبق على أغلب الشموع وبما أن ريحتها دافية أحس تناسب تكون في الصالة

💜💜💜
نجي الآن للشمعة التي تحتل المرتبة الثانية وهي هذي من مجموعة White Barn

اسمها Mineral Springs

وتعني الينابيع المعدنية بس بصراحة ما أشم أي معادن فيها بالعكس تميل جدا للعطور الرجالية الباردة والفخمة مع ريحة نظافة ،، يقال أنه مضاف لها الزنبق مع ليمون وأشوف حلو لو تشغليها بعد الإستحمام لأنها رائحة منعشة

💜💜💜

اسمها Beautiful Day
يعني يوم جميل ريحتها صيفية وقوية، عبارة عن مزيج من البابونج والتفاح والخشب أحس أكثر شيء تناسب في دورات المياة وأنتم بكرامة

هذي بإختصار الشموع الكبيرة وجربت كمان من ضمنها شمعة Tiki Beach رائحتها صيفية وكانت جدا جميلة بس ما عندي صورة لها خلصت

💜💜💜
نجي الآن للشموع الصغيرة 
وأولها هذي الشمعة 

اسمها Paris Amour

معناها باريس الحب (كلمة آمور فرنسية معناها الحب )
هذي الشمعة ريحتها خيالية ، عبارة عن توليب  وأحس فيها شوية فانيلا وبجد تناسب غرفة النوم أو بعد جلسة مساج وإسترخاء 👌
كان عندي الحجم الكبير منها 

💜💜💜
الشمعة الثانية برضو جميلة بس أقل من الأولى وهذي هي

اسمها Midnight Pomegranate 

يعني رمان منتصف الليل ههههه ، رائحتها رمان مع توت أسود وتناسب دورات المياة لكن مشكلتها مو مره تفوح لأن الفتيل حقها نحييف مره وهذا يخلي نورها خافت عشان كذا لما تشتروا شموع افتحوها وشوفوا الفتيل لازم ما يكون نحيف بزياده يعني يكون عريض شوي

💜💜💜
آخر شمعة جربتها كانت جدا جميلة أتعب وأنا أوصف جمال رائحتها وهذي هي

اسمها Japanese Cherry Blossom 

ومين مايعرف هذي الريحة عبارة عن زهور الكرز اليابانية مع الكمثرى وخشب الصندل ، بجد متميزه وتفوح في المكان

💜💜💜
في الأخير شموع باث آند بودي اللي جربتها نوعين الكبيرة ويكون فيها ثلاث فتيلات والصغيرة فتيل واحد 
الكبيرة تناسب في الغرف الكبار علشان ريحتها تكون أقوى
أما الصغيرة تناسب دورات المياة والمطبخ
وعلشان تحافظي على شموعك حاولي دايم قبل تشغلينها تشذبين الفتيل بس برفق مره لأنه ممكن ينكسر ، بالنسبة لي أشذبه بيدي يعني أشيل الطرف الكبير اللي يكون فوق ..

ومن التعليمات اللي كاتبينها عليها لا تشغلين الشمعة أكثر من أربع ساعات 
آخر شيء تقدرين تحطين الشمعة وهي طافيه طبعا في دولاب الملابس وراح تعطر الملابس وتعطيها ريحة خورافية..

وهذي ولاعة شموع جدا جميلة وعملية تناسب الشموع الكبيرة أحسن من الولاعات الصغيرة اللي ممكن تحرق يدك

متوفرة في السوبرماركتات الكبيرة ومراكز التوفير

💜💜💜
وأخيرا أتمنى تكونوا استمتعم والأهم استفدتم من هذا الريفيو البسيط وإذا عجبكم شيء منها شاركوني آرائكم اللي أسعد بها كثيرا

شكرا لوقتكم وأشوفكم في تدوينة جديدة بإذن الله