اختبار الإعادة جامعة الملك خالد

                                     بسم الله الرحمن الرحيم                                           

مرحبا بكل اللي عندهم اختبار اعادة حياكم الله ويارب الموضوع يفيدكم زي ما تمنيت .

أول شيء راح أقولكم أنا وين اختبرت وإش التخصص ، اختباري كان في شهر ستة اللي راح طبعا أنا من أول مقدمة على وظائف الإعادة تقريبا من شهر أربعة وإنتظرت شهر وبعدها وصلني مسج وهذا نصه ( عزيزي المتقدم/ة على وظائف الإعادة للعام ١٤٣٧ نفيدكم بترشحكم لدخول الإختبار التحريري وذلك الأحد -بتاريخ ٢٥/٦/١٤٣٧ من الساعة ١٢-١٠ولمعرفة مقر الإختبار الدخول على الرابط التالي {رابط الجامعة}) طبعا أرسلوا بعدها انو لازم أجيب الهوية الوطنية أو كرت العائلة ....

المهم نجي لأيش تخصصي طبعا تخصصي لغة إنجليزية وإختباري كان في جامعة الملك خالد كلية العلوم والآداب اللي على طريق الملك عبدالله ،،،

للأسف أنهم أرسلوا لي المسج هذا قبل الإختبار بأسبوع فقط ولضيق الوقت ما عرفت وش أذاكر ووش أخلي ورحت على النت ابحث وابحث بس الصدمة ماحصلت أي مواضيع متعلقة بالإختبار أو على الاقل طريقة الأسئلة هل بتكون من المنهج اللي درسناه في الجامعة او فقط متعلق بأساسيات اللغة ومره تحطمت لأني وجدت مواضيع متناقضة من عام ٢٠٠٩ ،، وبصراحة هذا أكبر سبب خلاني انشئ هذه المدونة عشان أنزل تجاربي في الإختبارات وأنشئ محتوى هادف ..

طبعا انا ذاكرت بشكل عام من النت ومن بعض كتب الجامعة ،،،

الأحد الساعة التاسعة صباحا كنت في الجامعة ومباشرة دخلونا القاعات طبعا بأسمائنا مو ندخل كذا علطول ،، وكل طالبة تجلس على الطاولة اللي مكتوب عليها اسمها ولما جلسنا بدأو يشيكون على اسمائنا ويخلونا نوقع على ورق معهم ونكتب درجاتنا في toefl او ielts او step ودرجاتنا في قدرات الجامعيين .

بعدها بعشر دقايق بدأو يوزعون الورق وكانت صدمة قووووية لي لأن أول ما مسكت الورق كانت كثيرة تقريبا عشر صفحات وكلللللها من المنهج اللي درسناه في الجامعة.

بقولكم إش هيه الأسئلة :

الصفحة الأولى ترجمة ست جمل من الإنقليزي إلى العربي وفيها idioms .

الصفحة الثانية ترجمة قطعة عن الصراع في سوريا من الإنقليزي إلى العربي .

الصفحة الثالثة ترجمة قطعة عن عاصفة الحزم من العربي إلى الإنقليزي ، وبما أن 

القطع سياسية أنصحكم تطلعون على المصطلحات السياسية وترجمتها زي ( رئيس الوزراء ، هدنة ، صلح ، معسكرات ، حملات إنتخابيه والخ .)

الصفحة الرابعة عبارة عن جدول فيه مجموعة حروف تقريبا عشرة حروف وثلاث خانات (place of articulation /manner of articulation / voiced or voiceless) هذي راجعوها من كتاب introduction to linguistics المستوى الخامس .

في نفس الصفحة حاطين جملة وطالبين نسوي لها syntactic structure .

أيضا في نفس الصفحة فيه جملة( ambiguity  (the teacher bought her food طبعا تصير أن المدرسة اشترت طعامها و المعنى الثاني أن التيشتر اشترت لوحده ماندري مين ممكن بنتها اختها اشترت لها الطعام .

الصفحة الخامسة كانت عبارة عن مقال تقريبا ثلاثة أرباع الصفحة عن موضوع متعلق باللغويات وكان تحته سؤال ماني فاكرته بالضبط بس اللي أذكر إنو أذكر وجهة نظري في موضوع طرح في المقال وتكون اجابتي في حدود ١٥ سطر ،،

والصفحة السادسة كانت فاضيه عشان أكتب فيها جوابي .

الصفحة السابعة سؤالها متعلق ب literature وكان تعريف characterization  .

الصفحة الثامنة كانت برضو متعلقة بالأدب وكانت تعريف واحد من ثلاثة أشياء مع ذكر مثال لشخصية أدبية :

1-Protagonist and Antagonist

2-Connotation and Denotation

3-Static and Dynamic character

 انصحكم بعمل مراجعة للتعاريف من كتاب introduction to litrary forms المستوى الخامس .

الصفحة التاسعة والأخيرة كانت عبارة عن سؤال لماذا أرغب بالإلتحاق بجامعة الملك خالد وما الشيء اللذي يجذبني في اللغة وماهو افضل تخصص بالنسبة لي وماهي المزايا اللتي تميزني عن غيري ؟ 

وبس هذا كان إختباري اتمنى تكونوا استفدتم والله يوفق الجميع ....

شكرا لوقتكم